केइ कुलु रिदुम्छा हो इ छाम्छे छेयुङ्मा नखावाम् फुक्साम् रिदुम्पि तुवे । रिदुम् नमा केइ नइये । केइ रिदुम्छा हो हापि खातेः सो रिदुम्आ इ नखावा खुरना कलिचायेः । रिदुम्आ इ हिला दुप्सिचायेः, लामिचायेः । केइआ इ रिदुम् माताम् सो इ रिदुम्आ केइ मतेःनो । खन्सा केइआ इ रिदुम् होदुम् होम्युम् छुनो । मारोदो रिदुम् रिप्खात्ना रिदुम्आङ् केइ मासितेः, यङितेः ।

खोरोलोइ रिदुम्मि निङ्पि दुमो उम् थेम्पाका थेम्पा बुःम्चाम् सो छुःनो । मारोदो रिदुम् फित्खाते । ललइआ छिप्पाक उम् गेइ तोत्तोछा दोम्खाम् छुवे । दुमो दोङाम् लो ओरोतो नखावा पिम् मान्तु ।

हेप् इ रिदुम्चि मदिपउ खुलुआ मयाम् लोसो नःप् तुवे । हेप् रिदुम्चि सेस्मोमिआ सेचिनिम् दम्ना मःम् ङाङ् सो छुवे । केइ रिदुम्छाकसा इ रिदुम्आङ् सेस्मोमि सेचिनिम् लोक लोलिसिचायेः । खुलु लो सेस्मोमिआ इ रिदुम् किदितस्कसा अङ्क सुम्निखाम्रेचि केइआ सम्सुमर्् छुवे ।

मिस् सेस्मोमि लो मदिपउ छुवेः । सेस्मोमि छुःम् सो इ हिलाङ् युचाइक  छुवे । इ पा लइमा लइमादो लो मा लइमा लइमादोलाक सेस्मो इपि युचाइक छुवे ।

सेस्मोमि उम् सेचिनिम् लोक छुवे । सेचिनिम्आ रुकु, मिकु, दाकवा पिःय । खङ्कचि सेस्मो सेस्मोतो कुबिमि, सेलेमि, मोप् छुवे । मदिपउआ तुम् तयाम्नोक सो रुकुआ तुम् तःय, ललिःय । तयाम्नोक सो मिकुआ तःय, खोमिःय । दाकवा पिःयना देत्तोक रिसिवा सो दत्खिय । खन्सा सेस्मोमि सुक् मिकुरि (तजष्चम भथभ÷तेस्रो नेत्र) लोक सो छु दुःर । क्ष्हतज कभलकभ या यचनबल (छैठौं इन्द्रिय) लोक सो छु दुःर । खङ्क रुकुमि, मिकुमि, दाकमिआ इ रिदुम् होदुम् युङिपियेः ।

सेस्मोआ मान्लाप् सो मिस् छुवेः । खङ्क मदिपउ पिकेः । सेस्मोआ मान्लाप् मिस् रुकु, मिकु पियेःनो । पदिपउआ नित्चि मुक्स्आ ङाङ् तयाम् । रुकु पियेःनो । खन्सा पदिपउआ रिदुम् होदुम्मि खुलु तोउ मःम् छुवे । खुलु मान्दि कुबिमि, सेलेमि, मोप्आ ङाङ् इ रिदुम् म दुराम्नो । खुलुआ इयाम्नाइ सेस्मोमिआ उम् सेचिनिम् दप्पना रिदुम् मयिपियेः ।

सेस्मो होप्मि सेक रिदुम्लाक ङाङ् माआ कोरो रिदुम्, कोप्दो रिदुम्, कोको रिदुम्, कुया रिदुम्ला सो लत्चाये । खन्सा केइ पारु लो निनाम् रिदुम्मि छाचिपि मदिपउमि हिपि सो सेस्मो, सेचिनिम् खुरुम्ताम्क छुवे । खङ्क इ होप्पि, फप् पाचिपि लत्नो सो छा, चास्, ययम् दुङ्पि लत्चाये । सेस्मो इ हिलाङ् युचाइकसा इ नखावा मिक्पिप्, इ छाम्छे छेयुङ्मा ताइप्पिप् सेस्मोमि सेचिनिम् लोक कुबिमि, सेलेमि, मोप् लत्चाये ।

सेस्मो लइम् मिन् लो इ सेमोपि यो छुवे, रुकु, मिकुपि यो छुवे जेइ खोमियेः । खङ्क होपाङ् ललिम्ना बोप् लासइ मःम्चिम् छुवे । खेना सेस्मो खाचिलु छु दो खुलु रिप्सु तुस्बुइचिका चाइ मःम्ना चुम्चिम् छुवे । खेना कुबिमि लइप् दो नागि मःम् छुवे, सेलेमि लइप् दो सेलेवा मःम् छुवे, मोप् लइप् दो मोप् थम् छुवे । लइम् छोउ सेस्मोमि छेइप् लेःप् खुलुचा इःम् छुवे । खङ्क दन्तो सेस्मोमिआ उम् सेचिनिम् दप्तो रिदुम् मःम् छुवे ।

फप्, पा सेस्मोमि तुतुतो चास्पि, छापि सेस्मो लत्चाइनो । फप्, पामि दुङ् खात्ना ङाङ् छा, चास्पि सेस्मो लत्ते । खन्सा फप्, पाम् सेस्मो तुवे मिन्तो छा, चास् चम्खाम् छुनो । रिदुम् मःप्चाप्मि खिम्पि दुङ् तातेक्स्कप्का इ रिदुम्आङ् सेस्मोमि लातिचायेः ।

सेस्मोमि छुःम् आसा बोलोते मिनेःना छुनो । सेस्मोआ लापेःना मुक्सा मान्ममो तुम्चाम् सो छुनो । मारोदो सेस्मो रिप्खाते । सेस्मो रिप् दो मन्साङ् मासितेः, यङितेः । सेस्मो नइ दो इ रिदुम् नइना नखावा पियिचायेः ।

रिदुम् मयाम् लो तुस्बुइ लाम्दइम् छुवे । छेतोः, लेसोः मिन्तो छारुइ तुस्बुइमि लाइस्पि लइम् लाम् छुनो । मारोदो छुल् तात्ते । छुल्आ हारेः, यङेः । तुस्बुइआ सो होप् ललिम्चिम्ना छारुइचा मइचि लो दुङ् नइ दो लाम् राम्दिम् छुनो । छारुइचि लाम् दनिव लोम् छुवे । तुस्बुइआ मदित मिन्तो छारुइ सो वाये वाये तुम्चाम्

छुनो । छारुइआ सो रिदुम् लाम् छुवे, छेइम् छुवे, तुस्बुइ बोम् छुवे । तुस्बुइ नेन्क येइम् छुवे । गोङ् चानतो रिदुम् मःम् छुवे ।

इ रिदुम् छेइम्चाम्, लेःम्चाम्, लाम्चाम्, छाम्चाम् नये । खोरोलोइ छेतोः, लेसोः, मिन्तो होप्तोकपि ओरो गेम्तुम् मस्कोपि रिदुम् मःम् छुनो, रिसिवा सो मःम् छुनो । मन्तोङ् मयाम् दो रिदुम् फित्खात्ना रिदुम्आङ् मासितेः, युपितेः ।

कुलु सियिखातेःकप्का सिप्मि साइ पोम्लालुङ् छोक्साःम् । पोम्लालुङ् महाकुलुङपिक गुदेल्मि लिम्चोलाम् चिस् मक्तोः सोगोपि तुवे । सोगोम् रापि देप्सिवा सालापैस् लुङ् तुवे । खः लुङ्पि हायाम् देप्सिवा लुःबम्चि सो तुवे । लुबम्चि मिक्पउचा खिर्दितस्क तुवे । केछे लाइस्पि खः लुःबम्पि कुलुम् फःप्चि तुवा थे । फप्–पाचि पम्चिक लुःबम् पोम्लालुङ् छुक्तो खाता लो इः साराङ्गा छुवाक तुवे । कुलु रिङ्ला पोम्लास् पिकेःक सिप् मिस्मि साःइ पिकेः । सिपोम् साःइ तुस्को लुङ् पोम्लालुङ् मियाःम् । कुलु सियेः कप्का ‘पोम्लालुङ् खात्व’ पिकेःना अपाःम् ।

कुलु फःप् राताप्खु रावाला लिम्चोलाम् छोःपि ताइप् पोम्लालुङ् खाताना तुवादोङ् थे । राताप्खुआ उम् छा–माइचि, दिबुवा मःप् खेःप्, बेइ लिफुचि खोलोःक सो पोम्लालुङ् खाइना दिबुवा मतो रेम्चि थे । पोम्लालुङ्मि दोः हेम् खुच्युबुपि तुवादोङ् लो राताप्खुम् छारुइक छा काचिबुइ वारिन्दो सिया थे । खेना वारिन्दो पोम्लालुङ्पि खुम्चि थे । राताप्खु सो सिःकप्का उम् सायिछा खुम्चिक पोम्लालुङ्पिङ् तातोनिनाः खुमोनिव उम् छा–माइचि लःचि थे ।

दोस्का राताप्खु लो छेम्सिआ थाम्पु बात्चि थे । खुन्तोलो सो जःकपि सिः दोसो सिः कप्का खचि साइ पोम्लालुङ्पिङ् ताइम् रिङ् छुवा थे । खेना वारिन्दो सियालो मःस्क रिदुम् दोःस्पिक छाःचा दत्चि थे । सियाक खोलोःमि साइ पोम्लालुङ्ङा छोक्स्चि थे । खिक्का एक्सा केइ कुलु हाकपि सियेः दोःसो पोम्लालुङ्ङा छोः लइया ।

उम् छा दोपा सिया कप्का राताप्खुम् निःउ पोम्लालुङ्पि मान् केप्पा थे । खन्सा उम् छा–माइचिका पोम्लालुङ्ला हानेकोःम्, लिबुबुङ्, थाकिदो हेम् तुतो दोःस्पि बोदेल् खाताना दिबुवा मतो तुवा थे । राताप्खुम् दिबुवा मःप् इबुम् खेःप् तुवा थे । खः खेबा दिबुवा सेत्ना तात्दोङ्क तुवाथे । खुङ्कने चिस् तात्तोपिका खेःप् ने युपा–युपा दिबुसा मान्दि होप्तोङ् आत्ता थे । चिङ्केल्वा ङाङ् खेःप्मि गाम् ने किल्सेवा आत्ता थे । दिबुवा मान्दि खेःप् आत्ता कप्का राताप्खुम् निःउ का थे । खेना उनाइ दिबुसा मान्दि खेःप् आत्ते पिकाना चःम् मिना थे ।

खिक्का राताप्खुआ उम् लोःप् छुबुइ योक्सुम्बोउपि बप्स्ना खेःप्मि पइपि काङ्पि थे । खेना बम्पा योक्सुम्बोउपिका छुबुइ हुम्नु मिनाना चिःमाछा गोःदि रत्युक्स् थे।

छुबुइ पइपि काःम्पा खेःप् दिबुवापि सोःगो खाता थे । खः खेःप्आ हुप्स्क छुबुइ सल्तो राताप्खु खाता लो खेःप् ने छेम्सि तुस्को हुलु तातेक्सा थे । खेना हारो हारो हुकाचा थे । छेम्सिआ सिछोपि वोङाना राताप्खुम् खेःप् बेइआ आम्सेम् पिक् थे । खोरोलोये ‘अ खेप्ने ओमि ये । सेत्नव’ पिकाना राताप्खुआ छेम्सि लः थे । खेना छेम्सिआ राताप्खुम् खेःप् मान्आःप् थे ।

छेम्सि सिछोला लत्ता थे । खः खेबा मङ्कपि दिबुसा कल्तात्क तुवा थे । दिबुवा निप्पोआ गुल् सेत्चिना इतोःतो हास्चि थे । खोरोलोये छेम्सिआ दिबुसापि दुङ् लःप् मक राताप्खुआ लःलि थे । छेम्सि तुवाक थाम्पु हुलु हेम् हायाम् छिमर्् छुवाक तुवा थे । खन्सा राताप्खुआ सो हुलु हायाम् नत्क तुवा थे । हुलु हेम् दिबुसाक खुन्तो मान्तुवा थे ।

राताप्खु तुवाक हेम्क दिबुसा हायाम् तुवा दोःसो छिमर्् छुःस्को थाम्पु खुन्तो मान्तुवा थे । सायिछा वारिन्दो सिया कप्का राताप्खुआ गुदेल् खुन्तो मान्नत्चक तुवा थे । दिबुसा हास्चिना छेम्सि लो राताप्खु हुलु कोःम्पि हायाम् तात्तो नेन्चा थे । खेना राताप्खु उम् खेःप् लो उम् तेल् हेम् आत्ता थे ।

राताप्खुआ दुङ् नःप् दिबुसाचि हुक्छो खुर्ना छेम्सि तुप्स् हुलु खात्दोङा थे । हायाम् रिङ्छाम् छुक्तो खाता लो इक्लेइ छेम्सिआ राताप्खु लःय थे ‘बुमे, आम् थाम्पुपि दिबुसा हायाम् तःयाम् । चिचिस् इचि थाम्पु माःरो बात्चु माका ।’ राताप्खुआ लाइस्पि यिकाङ् थाम्पु बाइम् मिनाचाकङ् तुवा । खन्सा राताप्खुआ छेम्सि लःय ‘थाम्पु बात्चु दो चिचिस् माआ, खोलोःङ् बात्चु । चिचिस् ङाङ् बात्चु लो थाम्पु निस् देउ छुःहो खोन्ला तेक्नो । दोस्का इचि छाःस् सो तङ्लात्नो ।’

छेम्सिआ दिबुसा तुप् थाम्पु लाम्तित् लो राताप्खुआ युक्स्क चाइ दुवाङ् नत् थे । राताप्खुम् छा वारिन्दो पोम्लालुङ्पि खुम्पा तुवा । खन्सा राताप्खु सिः कप्का पोम्लालुङ्पिङ् खुम् चाइ सो मःस् थेना निप्पोङ् थाम्पु बाइप् छुवा थे । खुङ्कला एक्सा हुङ् योउमि अन्वादे नावादे तुप् खोलोःआ पोम्लालुङ्पिङ् सिःया कप्का ताइ लःम् सो चाइ छुवा थे । खेना कुलु फःप्चि छेम्सि, ताम्सि, राताप्खु लो खप्दुलु खोलोःआ पोम्लालुङ्पिङ् सिपोम् साःइ ताइप् छुवा थे । खन्सा इनिम्बा सोङ् कुलु हाकपि सियेः दोःसो पोम्लालुङ्पि ताइ लइया ।